Naidheachdan

Iarrtasan air fhosgladh airson Mòd Nàiseanta Rìoghail Loch Abar 2025

Published: 17 Feb 2025

Farpaiseach le duais
Tha iarrtasan Mòd Nàiseanta 2025 fosgailte

​Tha luchd-eagrachaidh A’ Mhòid Nàiseanta Rìoghail, an fhèis chultarail is ainmeil a thachras gach bliadhna, a’ sireadh iarrtasan airson Mòd na bliadhna ann an Loch Abar.

A’ tilleadh dhan Ghearasdain agus an sgìre mun cuairt 10 – 18 Dàmhair, an naoidheamh uair a bhios an tachartas 133 bliadhna a dh’aois sa sgìre. Bha a’ chiad Mhòd Nàiseanta Loch Abar ann an 1922 agus tha ochd bliadhna air a bhith ann bho chaidh a chumail mu dheireadh ann.

Bha còrr air 2,700 com-pàirtiche aig Mòd an Òbain 2024 ann an timcheall air 200 farpais, am Mòd a bu mhotha ann an còig bliadhna, agus tha An Comunn Gàidhealach an dòchas gum bi Mòd na bliadhna-sa a cheart cho soirbheachail.

Feumaidh iarrtasan aig farpaisich no buidhnean a bhith staigh aig meadhan-oidhche Disathairne 31 Cèitean. Tha iomadachd farpais ann, nam measg: seinn còisir, bogsa-ciùil, fidheall, dràma agus Cogadh nan Còmhlan.

Gheibhear liosta nam farpaisean sna Clàran-eagair an seo agus gabhaidh iarrtasan a chur a-steach an seo.

Thuirt Seumas Greumach, Àrd-oifigear a’ Chomuinn Ghàidhealaich: Chunnaic sinn na mìltean aig farpaisean Mòd an-uiridh, a’ cur ri leasachadh na Gàidhlig an Alba agus a’ comharrachadh ar ceòl is ar cultar. Tha na farpaisean aig cridhe an tachartais agus tha e tlachdmhor fhaicinn an dàimh, pròis agus an coimhearsnachd am measg nam farpaiseach. Ged a bhiodh tu air a bhith an sàs aig iomadach Mòd no a’ tòiseachadh as ùr, mholainn gun dèan thu iarrtas agus a dhol an sàs san tachartas mòr Albannach seo. Tha fhios gum faigh sinn deagh aoigheachd ann an Loch Abar agus tha sinn air bhioran Am Mòd a thoirt air ais a-rithist san Dàmhair.

Thuirt Cathraiche Comataidh Gàidhlig Chomhairle na Gàidhealtachd, an Comhairliche Calum Rothach: “Tha Comhairle na Gàidhealtachd air leth toilichte gu bheil am Mòd a’ tilleadh a Loch Abar, far a bheil cliù aig a’ choimhearsnachd airson a dualchais Ghàidhlig is chultarach, gu h-àraid a thaobh ceòl traidiseanta. Tha a’ Chomhairle a’ toirt taic don dreuchd chudromaich a th’ aig a’ Mhòd ann a bhith a’ brosnachadh cleachdadh na Gàidhlig agus a’ togail deagh ìomhaigh airson a’ chànain tron chruinneachadh shuaicheanta am measg coimhearsnachd na Gàidhlig. A bharrachd air na farpaisean, tha am Mòd a’ toirt cothrom cudromach do luchd-labhairt de dhiofar chomasan a’ Ghàidhlig a chleachdadh gu neo-fhoirmeil tron tachartas agus cuiridh seo gu mòr ri beòthalachd shòisealta, eaconamach is chultarach coimhearsnachd Loch Abar.”

Thèid Am Mòd Nàiseanta Rìoghail a chumail ann an àite eadar-dhealaichte air feadh na h-Alba san Dàmhair gach bliadhna. ’S e a’ phrìomh fhèis cànan, spòrs, ealain agus cultar na Gàidhlig. A bharrachd air na farpaisean tha prògram an iomaill anns am bi cuirmean-ciùil, bùthan-obrach, taisbeanaidhean agus seiseanan ann an tòrr àitean sa sgìre. Thadhail mu 9,000 neach air Mòd 2024 agus chruthaich e àrdachadh eaconamach £3.6 millean don Òban.

Tillidh Am Mòd Nàiseanta Rìoghail 2025 a Loch Abar 10 – 18 Dàmhair. Dùnaidh iarrtasan farpaisean Disathairne 31 Cèitean. Siostam iarrtais an seo.

« Back to Mòd News List

Proudly Sponsored By

Sangobeg Investments Ltd

Sangobeg Investments Ltd

BBC Alba

BBC Alba

Caledonian MacBrayne

Caledonian MacBrayne

SQA

SQA

The Scottish Government

The Scottish Government

Bòrd na Gàidhlig

Bòrd na Gàidhlig

Creative Scotland

Creative Scotland

Event Scotland

Event Scotland

The Highland Council

The Highland Council

Site Map
Contact Us

Inverness - 01463 709705
Stornoway - 01851 703487

info@ancomunn.co.uk

Online Entry

Manage your membership and account details in our online system.

LOGIN NOW

Connect with Us